ஜகமே தந்திரம் படத்தில் தனுஷின் கதாபாத்திரமான சுருளியை பிரதிபலிக்கும் வகையில் டுவிட்டர் நிறுவனம் எமோஜி வெளியிட்டுள்ளது.
இயக்குநர் கார்த்திக் சுப்புராஜ் இயக்கத்தில் தனுஷ் நடிப்பில் உருவாக்கப்பட்டுள்ள படம் ஜகமே தந்திரம். இந்தப் படத்தில் தனுஷுடன் இணைந்து சஞ்சனா நடராஜன், ஐஸ்வர்யா லெட்சுமி, கலையரசன், சின்னி ஜெயந்த் ஆகியோர் உள்பட சினிமா பிரபலங்கள் பலரும் நடித்துள்ளனர். சந்தோஷ் நாராயணன் இந்தப் படத்திற்கு இசையமைத்துள்ளார். ஒய் நாட் ஸ்டூடியோஸ் நிறுவனம் இந்தப் படத்தை தயாரித்துள்ளது.
கடந்தாண்டு மே மாதம் திரைக்கு வர இருந்த நிலையில், கொரோனா லாக்டவுன் காரணமாக வெளியாகவில்லை. இந்த ஆண்டும், கொரோனா 2ஆவது அலையின் தாக்கம் நாளுக்கு நாள் அதிகரித்து வரும் நிலையில், திரையரங்குகளும் மூடப்பட்டுள்ளன. படப்பிடிப்புகளும் நிறுத்தி வைக்கப்பட்டுள்ளன. வரும் ஜூன் 18 ஆம் தேதி ஓடிடி தளமான நெட்பிளிக்ஸில் வெளியாக இருக்கிறது.
அண்மையில், இந்தப் படத்தின் இடம் பெற்றுள்ள நேத்து பாடலின் வீடியோ வெளியாகி இருந்தது. இதைத் தொடர்ந்து ஜகமே தந்திரம் படத்தின் டிரைலர் வெளியாகி சமூக வலைதளங்களில் வைரலானது. சோழர் பரம்பரையில் ஒரு லண்டன் தாதா என்று தனுஷ் டயலாக் பேசும் காட்சி ரசிகர்களிடையே அமோகமாக வரவேற்பு பெற்றது.
இந்தப் படத்தில் தனுஷ் சுருளி ராஜன் என்ற கதாபாத்திரத்தில் நடிக்கிறார். இதனை பிரதிபலிக்கும் வகையில் டுவிட்டர் நிறுவனம் சுருளி வடிவில் எமோஜி வெளியிட்டுள்ளது. ரசிகர்கள் இதனை கொண்டாடி வருகின்றனர்.
