நடிகர் மணிமாறன் கொரோனா காரணமாக உயிரிழந்தைத் தொடர்ந்து இயக்குநர் பா ரஞ்சித் டுவிட்டரில் இரங்கல் தெரிவித்துள்ளார்.
கடந்த 2020 ஆம் ஆண்டு தாக்கத்தை ஏற்படுத்திய கொரோனாவின் 2ஆவது அலை தற்போது நாடு முழுவதும் அதிக பாதிப்பை ஏற்படுத்தி வருகிறது. நாளுக்கு நாள் அதிகரித்து வரும் கொரோனா தொற்று காரணமாக பலியானோர் எண்ணிக்கையும் நாளுக்கு நாள் அதிகரித்து வருகிறது. அதோடு பாதிக்கப்பட்டவர்களின் எண்ணிக்கையும் அதிகரித்து வருகிறது. கொரோனாவுக்கு சினிமா பிரபலங்களான இயக்குநர், ஒளிப்பதிவாளர் கேவி ஆனந்த், இயக்குநர் தாமிரா, நடிகர் பாண்டு, பாடகர் கோமகன், டிகேஎஸ் நடராஜன் என்று பலரும் உயிரிழந்துள்ளனர்.
நந்திதா ஸ்வேதா, ஆண்ட்ரியா, அம்மு அபிராமி என்று பலரும் கொரோனா தொற்றால் பாதிக்கப்பட்டுள்ளனர். இந்த நிலையில், மேடை நாடக கலைஞரும், ஸ்டண்ட் கலைஞரும், தளபதி விஜய் நடிப்பில் வந்த வேட்டைக்காரன், விஷ்ணு விஷால் நடிப்பில் வந்த வேலைன்னு வந்துட்டா வெள்ளக்காரன், கில்லி, சார்பட்டா பரம்பரை உள்ளிட்ட பல படங்களில் நடித்த நடிகருமான மணிமாறன் கொரோனா தொற்று காரணமாக இன்று உயிரிழந்துள்ளார்.
செங்கல்பட்டு மாவட்டம் நத்தம் பகுதியில் வசித்து வந்த மணிமாறனுக்கு கடந்த 2 நாட்களுக்கு முன்பு கொரோனா தொற்று ஏற்பட்டுள்ளது. இதையடுத்து, செங்கல்பட்டு அரசு மருத்துவமனையில் சிகிச்சைக்காக அனுமதிக்கப்பட்டார். இந்த நிலையில், சிகிச்சை பலனின்றி இன்று உயிரிழந்துள்ளார் என்பது குறிப்பிடத்தக்கது.
மணிமாறன் மறைவுக்கு சினிமா பிரபலங்கள் பலரும் இரங்கல் தெரிவித்து வருகின்றனர். அந்த வகையில் இயக்குநர் பா ரஞ்சித் டுவிட்டர் வாயிலாக தனது இரங்கலை தெரிவித்துள்ளார். இது குறித்து அவர் கூறியிருப்பதாவது: கடக்க முடியாத துயரம். எப்போதும் கட்டுக்கடங்காத அன்பை பொழியும் மாறன் அண்ணாவே, உன் முகத்தைக் கூட காட்டவில்லை என்று உன் மகள் அழுகிறாள்-ணா!! என்னிடம் தேற்றுவதற்கு வார்த்தைகள் இல்லை. நண்பர்களே பாதுகாப்பாக இருங்கள் என குறிப்பிட்டுள்ளார்.
தற்போது இயக்குநர் பா ரஞ்சித் இயக்கத்தில் ஆர்யா நடிப்பில் உருவாகி வரும் சார்பட்டா பரம்பரை படத்தில் மாஞ்சா கண்ணன் என்ற ரோலில் நடித்துள்ளார். ஆனால், இந்தப் படம் இன்னும் திரைக்கு வரவில்லை என்பது குறிப்பிடத்தக்கது.
கடக்க முடியாத துயரம்..எப்போதும் கட்டுகடங்காத அன்பை பொழியும் மாறன் அண்ணாவே, உன் முகத்தை கூட காட்டவில்லை என்று உன் மகள் அழுகிறாள் ணா!! என்னிடம் தேற்றுவதற்கு வார்த்தைகள் இல்லை!! நண்பர்களே பாதுகாப்பாக இருங்கள் !! pic.twitter.com/ZuS2EF2u8c
— pa.ranjith (@beemji) May 12, 2021
