அண்ணாத்த படத்தைத் தொடர்ந்து தனுஷ் இயக்கத்தில் உருவாக இருக்கும் புதிய படத்தில் ரஜினிகாந்த் நடிக்க இருப்பதாக கூறப்படுகிறது.
சிவா இயக்கத்தில் ரஜினிகாந்த் நடிப்பில் உருவாகி வரும் படம் அண்ணாத்த. சன் பிக்சர்ஸ் நிறுவனம் தயாரிப்பில் உருவாகி வரும் இந்தப் படத்திற்கு இமான் இசையமைத்துள்ளார். இந்தப் படத்தில் ரஜினியுடன் இணைந்து நயன்தாரா, மீனா, குஷ்பு, கீர்த்தி சுரேஷ், சதீஷ், சூரி ஆகியோர் பலர் நடித்துள்ளனர்.
கடந்த ஆண்டு ஹைதராபாத்தில் நடந்த படப்பிடிப்பின் போது படக்குழுவினருக்கு கொரோனா தொற்று ஏற்பட்டது. இதையடுத்து, ரஜினிக்கும் உடல்நிலை பாதிக்கப்பட்டது. இதன் காரணமாக படப்பிடிப்பு நிறுத்தப்பட்டது. ரஜினியும் சென்னை திரும்பினார். கிட்டத்தட்ட 4 மாத இடைவெளிக்குப் பிறகு சட்டமன்ற தேர்தலில் வாக்களித்துவிட்டு ரஜினி மீண்டும் அண்ணாத்த படப்பிடிப்பில் கலந்து கொண்டார். அவருடன் இணைந்து படக்குழுவினரும் கலந்து கொண்டுள்ளனர்.
இரவு, பகலாக நடந்து வந்த அண்ணாத்த படப்பிடிப்பில் கலந்து கொண்ட ரஜினிகாந்த் தனது காட்சிகள் அனைத்துயும் முடித்து விட்டு சென்னை திரும்பினார். விரைவில், போஸ்ட் புரோடக்ஷன் பணிகளும் தொடங்கப்பட இருக்கிறது. ஏற்கனவே அறிவித்தபடி வரும் நவம்பர் 4 ஆம் தேதி தீபாவளி பண்டிகையை முன்னிட்டு அண்ணாத்த படம் திரைக்கு வர இருக்கிறது.
இன்னும் சில வாரங்களில் ரஜினிகாந்த் அமெரிக்கா செல்ல இருக்கிறார். அங்கு, தனது முழு உடல் பரிசோதனையை மேற்கொள்ள இருப்பதாக கூறப்படுகிறது. அமெரிக்காவிலிருந்து வந்த பிறகு மருமகன் தனுஷ் இயக்கத்தில் உருவாக இருக்கும் புதிய பட த்தில் ரஜினிகாந்த் நடிக்க இருப்பதாக கூறப்படுகிறது. எனினும் இது குறித்து முறையான அறிவிப்பு விரைவில் வெளிவரும் என்று எதிர்பார்க்கப்படுகிறது. கடந்த 2017 ஆம் ஆண்டு திரைக்கு வந்த பா பாண்டி படத்தை தனுஷ் இயக்கியுள்ளார் என்பது குறிப்பிடத்தக்கது.
