அண்ணாத்த முடிந்து வீடு திரும்பிய ரஜினிகாந்த்: ஆரத்தி எடுத்து வரவேற்ற மனைவி!

ஹைதராபாத்தில் நடந்து வந்த அண்ணாத்த படத்தின் படப்பிடிப்பு முடிக்கப்பட்ட நிலையில், ரஜினிகாந்த் தற்போது சென்னை திரும்பியுள்ளார்.

சிறுத்தை சிவா இயக்கத்தில் ரஜினிகாந்த் நடிப்பில் உருவாகி வரும் படம் அண்ணாத்த. சன் பிக்சர்ஸ் நிறுவனம் தயாரிப்பில் உருவாகி வரும் இந்தப் படத்திற்கு இமான் இசையமைத்துள்ளார். இந்தப் படத்தில் ரஜினியுடன் இணைந்து நயன்தாரா, மீனா, குஷ்பு, கீர்த்தி சுரேஷ், சதீஷ், சூரி ஆகியோர் பலர் நடித்துள்ளனர்.

கடந்த ஆண்டு ஹைதராபாத்தில் நடந்த படப்பிடிப்பின் போது படக்குழுவினருக்கு கொரோனா தொற்று ஏற்பட்டது. இதையடுத்து, ரஜினிக்கும் உடல்நிலை பாதிக்கப்பட்டது. இதன் காரணமாக படப்பிடிப்பு நிறுத்தப்பட்டது. ரஜினியும் சென்னை திரும்பினார். கிட்டத்தட்ட 4 மாத இடைவெளிக்குப் பிறகு சட்டமன்ற தேர்தலில் வாக்களித்துவிட்டு ரஜினி மீண்டும் அண்ணாத்த படப்பிடிப்பில் கலந்து கொண்டார். அவருடன் இணைந்து படக்குழுவினரும் கலந்து கொண்டுள்ளனர்.

Superstar #Rajinikanth returned back to Chennai after completing shoot for #Annaatthe at Hyderabad. @sunpictures pic.twitter.com/MVK3Afb34D

— Movie Bond Digital (@MovieBond1) May 12, 2021

ஹைதராபாத்தில் நடந்து வரும் அண்ணாத்த படப்பிடிப்பு பாதுகாப்பு முன்னெச்சரிக்கை நடவடிக்கைகளுடன் மேற்கொள்ளப்பட்டு வருகிறது. இன்னும் ஓரிரு நாட்களில் ரஜினிகாந்த் தனது காட்சிகள் அனைத்தையும் முடித்துவிட்டு சென்னை திரும்ப இருக்கிறார் என்று குறிப்பிட்டிருந்தோம். அதன்படியே, இரவு, பகலாக தனது காட்சிகள் அனைத்தையும் ரஜினிகாந்த் நடித்து முடித்து விட்டு தற்போது சென்னை திரும்பியுள்ளார். வீட்டிற்கு வந்த ரஜினிகாந்தை அவரது மனைவி லதா ஆரத்தி எடுத்து அன்புடன் வரவேற்றுள்ளார். அப்போது எடுக்கப்பட்ட வீடியோ சமூக வலைதளங்களில் வைரலாகி வருகிறது.

ஒரு சில மாதங்கள் ஓய்விற்குப் பிறகு ரஜினிகாந்த் அமெரிக்கா செல்ல இருப்பதாக கூறப்படுகிறது. கொரோனா இக்கட்டான சூழலில் திரையரங்குகள் மூடப்பட்டுள்ள நிலையில், ஏற்கனவே அறிவித்தபடி, அண்ணாத்த படப்பிடிப்பு வரும் நவம்பர் மாதம் 4 ஆம் தேதி தீபாவளி பண்டிகையை முன்னிட்டு திரைக்கு வரும் என்று எதிர்பார்க்கப்படுகிறது.

Welcoming our #Annaatthe!#AnnaattheDeepavali @rajinikanth pic.twitter.com/egRzWf0aY3

— #Annaatthe (@AnnaattheFilm) May 12, 2021